Mat 12 | MED | STEP | Mowi kor ou ui ei kᵾn, Jisas kᵾn elim nga kitip kᵾni wu mbᵾ kᵾn, wit pana kuta tetᵾm ei nga, rᵾk ting nombuⱡa mam ila purung. Jisas elim nga kitip kᵾni wu ni kᵾⱡ, kump kun ndi kolk, wit ropa pitim nimbᵾ nga mong mat, oldᵾk kont norung.

Matthew 12

Jisas Kᵾn Perisi Wu Kᵾⱡ Kᵾn, Mowi Kor Ui Ei Nga Ik Parᵾng

1 Mowi kor ou ui ei kᵾn, Jisas kᵾn elim nga kitip kᵾni wu mbᵾ kᵾn, wit pana kuta tetᵾm ei nga, rᵾk ting nombuⱡa mam ila purung. Jisas elim nga kitip kᵾni wu ni kᵾⱡ, kump kun ndi kolk, wit ropa pitim nimbᵾ nga mong mat, oldᵾk kont norung. 2 I etᵾng uⱡ ni, Perisi wu mat ndi kandᵾk, Jisas kundᵾk nᵾk mel, “Kana! Nim nga kitip kᵾni wu kᵾⱡ ndi, Moses nga mi ik ei, rok puⱡa rok, mowi kor ui ila, iti nᵾtᵾi nᵾtᵾm. Wote, uⱡ kᵾⱡ enmin ei ka!” nᵾtᵾng. 3 Wote Jisas ndi, nimba mel, “Buk Wingti ila, Depit kᵾn elim nga wu mbᵾ kᵾn, kump kun kurung ei kᵾn, namba uⱡ ti etᵾng ei, enim kᵾmp rok pᵾtmin, muna mon? 4 Elim Got nga manga ila murᵾk mba, Got kᵾn angge nᵾk, bret ngorung mbᵾ, tᵾpa elim numba, elim nga wu kunda purung mbᵾ, bret mat nguⱡnga norung. Angge bret mbᵾ, Moses nga mi ik ei ndi, nimba mel, ‘Wu pris kᵾⱡ mint neing,’ nᵾtᵾm. 5 Ei kupa, enim Moses nga mi ik ei, kᵾmp rok kandᵾrmin ei? Mowi kor ei kᵾn, kongun mon nᵾtᵾm. Ei nga wote, wu pris kᵾⱡ ndi, mowi kor ei kᵾn, Got nga manga wingti ila murᵾk puk, Got kᵾn rᵾng kalk tindiⱡim mundᵾk etᵾng. Ei wote, ⱡawa iti natᵾtmin. 6 Pᵾnmᵾn ye! Mel ti ya omba morum ei ndi, manga wingti nga ronduⱡ mbᵾ, akpa tᵾpa oⱡa ndupa morum. 7 Got nga ik mong ti, painui wu mbᵾ ndi, rorung ei ndi nimba mel, ‘Wamp kont kul uⱡ ei, na numan ngor, omba kng rᵾng mbᵾ kapⱡa tᵾndᵾtᵾm mundi uⱡ ei, na numan ngui nganggᵾr.’ Ik ei nga puⱡ ei, enim pilingina ndam, ya wu nit muⱡi nᵾmbᵾⱡi kᵾⱡ ik, ngui nganggᵾⱡina. 8 Na Muⱡᵾl Wu Kupa ei, mowi kor ei nga Nuim ei,” nitim.

Wu Ti Nga Ki Kit Itim Ei, Jisas Ndi, Ki Etpa Kai Itim.

9 Jisas ik nimba, murum kona ni wak ropa, mba manga wingti kel tila, murᵾk purum ila, wu ti ki orunga, kuⱡpa kel etᵾm wu ti murum. Manga ila wamp mat, Jisas uⱡ ⱡawa mat enim, Jisas kᵾn nimbun ndil ndil poⱡᵾp nᵾmin nᵾk pilik morung nimbᵾ ndi, Jisas waldᵾk nᵾk mel, “Mowi kor ei kᵾn, wamp etpa ti uⱡ ei, Moses nga mi ik ei ndi, mon nᵾtᵾm uⱡ ei etmin ei, kapⱡa muna mon?” nᵾtᵾng.

11 Jisas ndi, punt ropa nimba mel, “Akup enim mormun wamp kᵾⱡ nga, kng sipsip tenda ti mowi kor ei kᵾn, mba kut tila mana pum ndam, enim nambuⱡ ti iting? Kng puⱡ wu ei ndi, kelpa oⱡa ti natᵾmba ye? Ei mon, kng ei oⱡa tᵾmba mint. 12 Ei kᵾn, enim wamp mbᵾ, kng sipsip na mel nᵾrnga mbᵾ mel mon! Enim wamp mel imp ei nga, wamp ti mowi kor ei kᵾn, wamp ti tᵾpa rapᵾndᵾm ndam, kapⱡa etmba,” nitim. 13 I nimba kᵾn, ki kuⱡpa kel itim wu ni kundpa nimba mel, “Nim nga ki ei, tᵾkᵾn ron ndui!” nitim. Nilinga, ki ni ron nduⱡnga, tᵾngᵾnda mint ki ni, omba kai itim. 14 Perisi wu ni kᵾⱡ, Jisas itim uⱡ ni kandᵾk, popᵾⱡ kolk int puk, kanggᵾp ambulk, Jisas rop kundmin, nᵾtᵾng.

Jisas Ei, Got Nga Kongun Muⱡᵾl Wu Kupa Ei

15 Jisas elim ruimin nᵾtᵾng ik ni pilpa, kona ei wak ropa, kona elpa ronggᵾt ku purum. Wamp minal ndi, purum ni mel, akil tek pep rok orung. Wote, rᵾk ting mbila, kui peng itim wamp mat orung nimbᵾ, etpa kai mundrum. 16 Wamp etpa kai itim nimbᵾ kundpa, int puk, na enim nga endᵾnt uⱡ mbᵾ wamp mat kundᵾk, ‘Ni nᵾnᵾi! nitim. 17 I itim uⱡ kᵾⱡ ndi, unt painui wu Aisaiya ndi, ik ti pai numba nitim ik ei, omba kupa itim,

18 “Ya wu ei, na kandᵾp mbi ndup, tᵾp mundᵾr kongun wu ei, wu na numan ngor ei, wote na nga numan ei ndi, numan minal ngor ku. Na nga Muⱡnga ei, tᵾp mundamba omba, wu ei kᵾn moⱡmba, na nga wamp kᵾmp timp uⱡ ei, muⱡ uⱡ wamp mormun mbᵾ kᵾn, kundpa nᵾndpa kapⱡa endᵾmba.
19 Wote, nombuⱡa mam ᵾldᵾ mbila, elim nga kᵾng orunga, mepa oⱡa mba el ik nimba, ik mura etpa iti natᵾmba.
20 El elim ndi, wamp wening em mbᵾ kᵾn, raka raka nimba uⱡ mbᵾ etmba. El elim ndi, wamp wening eng mbᵾ kᵾn, uⱡ kai etᵾk tᵾk, rᵾpᵾndeing ei mel tᵾpa ora ndumba. Uⱡ mbᵾ, etpa mint pangga, Got nga pᵾtᵾm uⱡ kᵾⱡ pilik, kapⱡa ending ei kᵾn, uⱡ kit mbᵾ, el etpa int pendᵾmba.
21 Wu ei ndi, enim muⱡ uⱡ ila wamp mbᵾ, etpa tᵾmba nᵾk, nokundᵾk muⱡeing,” nitim.

Jisas Kᵾn Biyelsipul Raⱡ Nga Timan

22 Ei kᵾn wamp mat ndi, kur kit ei ndi, wu ti nga rukᵾr orunga moⱡpa, wu ei nga mong ei, kit etpa, keta mum petᵾm wu ni, mek Jisas murum ila orung. Wu ni, Jisas ndi, etpa tilinga wu ei nga mong na, keta na mbᵾ piral nilinga, ik nimba kona kandpa itim. 23 Wamp minal morung nimbᵾ, Jisas uⱡ itim ei kandᵾk, min ngᵾn mundᵾk, “Wu ei Depit nga kangᵾm ei muna?” nᵾk waldᵾtᵾng.

24 Perisi wu ni kᵾⱡ wamp mbᵾ nga, waldᵾtᵾng ik ni pilik, punt rok nᵾk mel “Kur kit mbᵾ nga nuim Biyelsipul ndi, wu ei ronduⱡ nguⱡnga, ronduⱡ mondpa, kur kit ei tᵾpa ekit ndonᵾm,” nᵾtᵾng.

25 Perisi wu kᵾⱡ, i nᵾk pilik etᵾng ik nimbᵾ, Jisas tᵾpa mendpa ei mel nitim, “Wu rᵾⱡaip tenda ti, rᵾk ila palk, orung orung etkᵾⱡ, el int yant enggil ndam, molk roⱡ pi nᵾpᵾnggil. Wote, kona peng ti muna, wamp mbo tenda kat kep, rᵾk ila palk, orung orung etᵾk, el eng ndam, kona peng muna, wamp mbo tenda kᵾⱡ molk, roⱡ pi nᵾpᵾng! 26 Ei mel ku, akup Seitan nga kona mumuk ila wu rᵾⱡaip mbᵾ, geka nangga, el rᵾk eng ndam, Seitan elim nga rᵾⱡaip mbᵾ namba etᵾk, ronduⱡ mundᵾk muⱡing? 27 Enim na kur kit mbᵾ nga nuim Biyelsipul ei ndi, na ronduⱡ nguⱡnga, kur kit mbᵾ, tᵾp mundunt ninmin. Akup enim kᵾn, pep rormᵾn wamp mbᵾ nam ndi, ronduⱡ nguⱡnga, kur kit mbᵾ tᵾk mundᵾnmᵾn? I ninmin ik ei ndi, enim kᵾn pep rok ormᵾn wamp mbᵾ ndi, kur kit tᵾk mundᵾnmᵾn uⱡ ei ndi, ora ndupa, enim ⱡawa enmin. 28 Wote, na kur kit tᵾp mondunt uⱡ ei, Got nga Muⱡnga ei ndi, ronduⱡ nguⱡnga int ndam, ya ila ekpi mendpᵾⱡ ora ndupa, Got nga tᵾpa mumuk rui uⱡ ei, enim kᵾn omba morum.

29 “Wamp nam ti ndi, wu mong kundi ti nga mel mbᵾ, namba etᵾk, manga ambulk kᵾndᵾp ting. Tᵾmba ndam, wu ei kapⱡa ambuⱡpa, kan ngumba, akil tepa mel mbᵾ tᵾmba.

30 “Na kᵾn, rᵾmp nanim ti ndi, na tᵾpa rei ndupa, na nga wamp mbᵾ, tᵾpa rapundpa, tᵾpa kᵾkᵾp iti natᵾm ti ndi, ropa mboⱡ mbaⱡ etᵾm. 31 Ei kᵾn, enim kundᵾp nᵾnt, wamp mbᵾ nga wei uⱡ menᵾpi na, ik kit Got kᵾn, muna wamp ti kᵾn, nᵾng ndam, Got ndi, uⱡ nit mbᵾ, wak romba. Wote, wamp nam ti ndi, Muⱡnga Wingti ei kᵾn, ik kit minᵾpi mat nimba, em ndam, wamp ei nga uⱡ nit mbᵾ, Got ndi, wak rui narᵾmba. 32 Omba, wamp nam ti ndi, Muⱡᵾl Wu Kupa ei kᵾn, ik kit mat nim ndam, wamp ei nga nit ei, Got ndi, wak romba. Wote, wamp nam ti ndi, Muⱡnga Wingti ei kᵾn, ik kit mat nimba em ndam, nit mbᵾ akup kep, wote kep, Got ndi, wak rui narᵾmba.

Nde Ei Kᵾn, Elim Nga Mong Ei Kᵾn

33 “Nde kit ei ndi, mong kit mbᵾ rorum. Nde kai ei ndi, mong kai mbᵾ rorum. Nde kit muna, kai ei mong rorum. Ei kᵾn, kandᵾp kun etmin. 34 Enim kimbuⱡa mbᵾ ye! Enim uⱡ kit mbᵾ etmin. Ei nga wote, ik kai mbᵾ etᵾk, ning mel nant? Wamp numan ila peka ropa petᵾm uⱡ mbᵾ, keta ila ekit orum. 35 Wamp kai ei ndi, numan kai mbᵾ pendᵾtᵾm. Ei mel ku, ik kai mbᵾ nᵾtᵾm. Wamp kit ei ndi, numan kit mbᵾ pendᵾtᵾm. Ei mel ku, ik kit mbᵾ nᵾtᵾm.

36 Pᵾnmᵾn an! Wamp kit kai raⱡ kᵾmp tᵾm Ui Ou ei kᵾn, wamp mbᵾ ndi, elpa elpa ik kurpa karpa nᵾk mek andinmin mbᵾ mel, wote Got kundᵾk ning. 37 Nim tᵾpa mong ngumba muna, tᵾpa kun mundᵾmba ei, nim nga nᵾtᵾn ik kᵾⱡ ndi, nimba kᵾmp tᵾmba,” nitim.

Uⱡ Rᵾpndi Mat Etangga Nᵾtᵾng

38 Ei kᵾn, mi ik mbo wu mat kᵾn, Perisi wu mat kᵾn ok, Jisas waldᵾk, “Ik mbo wu ye! Nim uⱡ rᵾpndi ti itana kᵾnmᵾn ka!” nᵾtᵾng. 39 Ni kᵾn, Jisas ndi, nimba mel, “Enim akup kalk tᵾnmin wamp mbᵾ, meka rok kelik, Got nga ik tᵾk rui nduk enmin. Enim na uⱡ rᵾpndi ti itamba kᵾnmᵾn ninmin ei? Ei mon! Na uⱡ rᵾpndi ti itamba, kᵾning ei, unt kor nga painui wu Jona kᵾn, itim uⱡ kandrung ei mel ku. 40 Jona ant raldika rumbᵾⱡ raldika oma mam ei nga, oⱡ rukᵾr ila pitim ei mel, Muⱡᵾl Wu Kupa ei, mana urum mᵾi min mana orunga piyangga, ant raldika rumbᵾⱡ raldika etmba. 41 Wamp kit, kai raⱡ kᵾmp tᵾm ui ei kᵾn, Ninipa kona ila wamp mbᵾ ndi, oⱡa anggilik, enim ik mura nguing. Ei nambuⱡ emel, wamp mbᵾ ndi, Jona Got nga ik puⱡ nimba ngurum ei kᵾn pilik, numan ropᵾl rorung. Pᵾnmᵾn ye! ‘Ya ila wamp ti, omba morum ei Jona mel mon, wamp ama muⱡ ei! 42 Wamp kit kai raⱡ kᵾmp tᵾm ui ou ei kᵾn, mek Sipa kona Amp Kwin ei ndi anggilpa, enim ik mura ngumba. Ei nambuⱡ emel, amp ei, elim nga mᵾi mana kona roⱡ ei wak ropa omba, king Solomon nga ik pilpa, kungᵾndi mbo endᵾtᵾm mbᵾ nga mat, pilimp nimba urum. Ei mel ku, enim nᵾmp ndoimp rundamp, ya ila wu ti omba morum ei, King Solomon murum ei mel mon. Wu ei, ama oⱡa ndupa ei, omba morum!” nitim.

Kur Kit Aldpa Kelpa Yant Orum

43 “Kur kit wamp kᵾn morum ei, makrᵾk tᵾk, ekit ndormᵾn ei kᵾn, mba kona kᵾp, kui waka tila muⱡ tᵾp, muⱡimp nimba purum. Wote, kona kᵾp ei mel ti kandpa, ti natᵾpa pilpa kᵾn, ei mel nᵾtᵾm, ‘Na pep moⱡᵾp unt manga ila kelip yant pamp!’ I nimba kᵾn mba kandrum mel, manga ni ⱡumᵾiya rok, etᵾk mon mundᵾk telingina, nuwa tetᵾm. 45 Ei kᵾn int mba, kur kit 7 elim, ei mel mon, ok ila pek mormin. Ei kᵾn, wamp ei akup morum ni, unt moⱡnga kit murum ei mel mon. Wote ama muⱡangga, kit elpa ti mel moⱡmba. Akup ui ila wamp rᵾⱡaip kalk tᵾnmin mbᵾ, uⱡ ei mel etmba,” nitim.

Jisas Nga Mam Kᵾn Ʉngᵾnᵾl Mbᵾ Kᵾn

46 Jisas wamp nimba kᵾn, ik nimba moⱡnga, elim nga ᵾngᵾnᵾl mbᵾ kᵾn, mam kᵾn orung. Ok pena orunga molk, Jisas kᵾn ik rungᵾndmin nᵾmp onmᵾn ei, ka nᵾk, wamp morung nimbᵾ waldᵾtᵾng. 47 Waldᵾtᵾng ik ni, wamp morung nimbᵾ nga ti ndi, pilpa mba Jisas kundpa nimba mel, “ Pᵾn ei! Nim nga manim kᵾn, ᵾngᵾnᵾl mbᵾ kᵾn ok, nim kᵾn ik rungᵾndmin nᵾk, pena anggilik mormun ei ka,” nitim.

48 Wote Jisas ndi nimba mel, “Na nga manᵾm kᵾn, na nga ᵾngᵾnᵾl kᵾⱡ namin?” nitim. 49 I nimba kᵾn, elim nga kitip kᵾni wu morung ni kᵾⱡ kᵾn, ki ruⱡ ropa nimba mel, “Kanmin ei! Ya kᵾⱡ, na nga mam kupa kᵾn ᵾngᵾnᵾl kupa mbᵾ. 50 Wamp nam ti ndi, na nga muⱡ kona Wuta ei ndi, itangga nimba pᵾtᵾm uⱡ kᵾⱡ mel etᵾm wamp, ei na nga ᵾngᵾn, na nga kimᵾn, omba na nga mam,” nitim.